القوانين العامه لعلبة الدردشه

صحت مشاعل على صوت المنبه الي كانت موقته على الساعه 8 ونص
8 ونص دخلت الحمام تتحمم
الساعه 9 استشورت شعرها
الساعه 9 وربع كانت تحط ميك اب خفيف صباحي
الساعه 9 ونص مثل كل يوم انجنت لانها تاخرت وصارت تلبس بسرعه وطلعت ووصلت
الجامعه الساعه 10 الا 10 راحت ركض لاتتاخر لان الدكتوره دقيقه بمواعيدها ولو تاخرت ربع ثانيه راح تنطرد
كانت تركض وشوي تطيح ماتدري تشيل الشنطه والا العبايه والا ادوات الرسم كل هذا علشان تاخرت
مشاعل " يالله ياليتني صحيت 8 ماكنت تاخرت بس يالله انا صاحيه قبل ساعه ونص ايش كنت اسوي بهالساعه ونص لازم يعني احط ميك اب صباحي ولازم استشور شعري ولازم اختار شوز نفس لون الشنطه ولازم اختار حلق صباحي ولازم احتار في اي عطر اتعطر يالله ليش مااجهز اغراضي قبل انام"
كان هذا الكلام الي كل يوم تقوله مشاعل لنفسها قبل تدخل المحاظره
مشاعل بنت تهتم بشكلها بجنون لازم مايكون ظفر اطول من ظفر ولازم تكون مافيه شعره مايله عن الترتيب الي هي رتبته ولازم يكون شكلها صباحي من لبس من عطر من جزمه وشنطه ومكياج وكل شي يعني بنت كوووووووووووووووووووول
دخلت المحاظره مع الدكتوره وعطتها الدكتوره نظره حست ان قلبها بيوقف
والحمدلله ماانطردت وانتهت المحاظره الساعه 12 وكان عندها محاظره الساعه 12 ونص وراحت ركض عليها وطبعا المحاظره ماحتخلص الا 3 يعني 3 ساعات من الطفش لان المحاظره هذي كانت نظريه يعني مافيه رسم او تطبيق يعني كطالبات في قسم رسم 3 ساعات كانت ممله بالنسبه لهم
بس مشاعل لقت شي تتسلى فيه وهو صاحبتها عبير الي معاها بالمحاظره بس المشكله ان المسافه بين عبير ومشاعل 6 طالبات يعني راح تسمع الدكتوره السوالف قبل ماتوصل عبير
اشرت مشاعل لعبير تفتح البلوتوث
وبدوا يضيعون الوقت بالرسايل
مشاعل" اقول عبوره ايش رايك تعزميني على الغدا اليوم مالي خلق اتغداء مع الوحش زوجه بابا"
انتظرت مشاعل رد عبير بس اظن المحاظره بتنتهي قبل لاتخلص عبير الكتابه لانها بطيئه في الكتابه
واخيرا وصل مشاعل الرد
عبير"وانتي ليش ماتعزميني , اكيد جوعانه وتبي تخسفي ميزانيتي"
مشاعل" ههههه لا بس بشوف انتي كريمه والا لا بس للاسف طلعتي قعيطيه هههه"
عبير" تاركه الكرم لك , المهم وين عازمتني"
مشاعل: امري لله انا عارفه انك اكوله بس بعزمك , ايش رايك نروح لفدركرز"
عبير" لا ايش رايك نروح لا ابيل بيز"
مشاعل" لا اموت جوع ولا اكل هناك اكلهم بارد تبي فدركرز والا ضفي وجهك"
عبير" اوكي خلاص متى"
مشاعل" بكره, ايش رايك يالفدغا ,, الحين اول ماتخلص روبن هود من كلامها نطلع"
عبير" ههههههههه ليش روبن هود"
مشاعل" ماشفتي شعرها نفس تسريحه روبن هود هههههههههه"
عبير" ههههههههه اوكي يالخبله بس ترى بنروح بسيارتك لان سواقي ماحيجيني اليوم"
مشاعل" ليه متطاقين هههههههههه"
عبير" هههههه لا بس امي طالعه معاه واخوي هو الي حيمرني وارسلت له رساله يمرني بالمطعم الساعه 4"
مشاعل" حبيبتي عادي اوصلك للبيت لاتخلي اخوك يمر"
عبير" لاهو اصلا طالع من الدوام يمرني مره وحده"
مشاعل" الي تشوفيه"
الدكتوره : بنات الحين الساعه 2 ونص وباقي على نهايه المحاظره نص ساعه وانا انتهيت الي عندها سؤال تسال
وطبعا محد سال علشان تقول يله انطلقوا
الدكتوره : خلاص بما انه مافيه اسئله انتهت المحاظره
مشاعل وعبير طلعوا بسرعه جنونيه خافوا تغير رايها
مشاعل : مابغت هي ويا وجهها كان احد فاهم
عبير: من جد تعور الراس
مشاعل: لحظه بدق على سارونه يمكن تروح معانا
وتصلت مشاعل على ساره بس ماردت
مشاعل: اكيد طلعت او عندها محاظره يله مشينا
عبير: مشينا
وركبوا الساره
مشاعل: يوسف
يوسف السواق: سمي طال عمرك
مشاعل : روح لفدركرز
يوسف: ابشري طال عمرك
مشاعل: يالله حر حر حر احس اني انشويت
عبير: من جد ارفعي على المكيف راح اموت حر
مشاعل: ارفعي انتي خدامه عندك انا
عبير: مغروره , يوسف ارفع على المكيف
يوسف: ابشري
وظلوا يسولفوا لحد ماصلوا اخيرا لفدركرز
عبير: يالله زحمه قلت لك زحمه اف
مشاعل: انا احب الزحمه انزلي بس
عبير :انشالله ياعمتي
وطلبوا الاكل وتغدوا وبعد مانتهوا دقت عبير على اخوها علشان تقول له مايمرها لان مشاعل اصرت انها ترجعها لبيتها
عبير: الو
خالد اخو عبير: هلا عبوره
عبير: هلا خلود وينك
خالد: انا قريب من فدركرز خلصتي غداء
عبير: ايه كنت بقول لك لاتمرني علشان ميشو راح ترجعني
خاالد: لالا مانبي نتعبها يالله اطلعي انا برا
عبير: انشالله
عبير: يالله ميشو اخوي خلودي برا تامري شي
مشاعل: لا حبيبتي عبوره سلامتك
عبير: يالله اطلعي ايش تستني؟؟؟
مشاعل: لاراح اجلس شوي وحطلع لان فيه واحد يراسلني بالبلوتوث ويقول انا عند ماكينه البيبسي راح اروح اشوفه انا حاسه انه الدب الي شفناه اول مادخلنا هههههههههه
عبير: ههههههههههههههههه يالله باي لايعصب اخوي
مشاعل: باي
عبير: وعلميني اذا صار الدب
مشاعل: ههههههه اوكي
وراحت عبير
طلعت مشاعل تشوف مين الي يراسلها ولقت الدب واقف عند ماكينه البيبسي وماتت ضحك يحليله يرقم بعد مايستحي على كرشته ههههههههههههه
دقت مشاعل ع السواق ع شان يقرب لها السياره لان الشمس مستحيل احد يتحملها الساعه 3 ونص كانت الشمس تذوب جبل من الثلج
ولما طلعت من المطعم ومالقت السياره
مشاعل: غريبه وين يوسف معقوله ماوصل , بتصل عليه واشوف وينه يالله لاطعني بالشمس سواقين اخر زمن
مشاعل : الو يوسف خير وينك ماقلت لك تعال لاتقول زحمه
يوسف: لا لا بس فيه واحد واقف وراي وساد علي ومو راضي يحرك سيارته
مشاعل: وينك طيب
يوسف ياشر بيده لمشاعل : في المواقف قدامك تشوفيني؟؟؟
مشاعل: ايه شفتك يالله انا جايه
ومشت مشاعل واخلاقها رايحه فيها مين ماكان هذا راح اخليه يعرف ان الله حق والله لاوريه شلون يوقف سيارته قدام سيارتي ويسد علينا ومو راضي يحرك سيارته بعد انا اوريه شكل امه داعيه عليه اليوم اكيد سواق خايف من عمته انا اوريه هو وعمته
وصلت مشاعل للسياره وفعلا لقت وراها فراري صفرا ومظلله كلها , غريبه ليش واقف اكيد السياره مافيه احد علشان كذا ماحرك
مشاعل: هاه يوسف كلمته يبعد سيارته
يوسف: مو راضي يكلمني اصلا
مشاعل: ياغبي السياره مضلله يمكن مافيها احد بعد اشوف
يوسف : لا هو مو راضي يتكلم
مشاعل: طيب خلاص بعد عن وجهي الحين
ومشت مشاعل لما وصلت السياره ووقفت عند شباك السواق وظلت تطق على الشباك بس محد فتح الشباك
مشاعل" اكيد السياره مافيها احد , لاتكون بس هذي عبير واخوها مسوين مقلب فيني"
وفجاءه انفتح الشباك انصدمت مشاعل من الي شافته جوا السياره
شاب ملك جمال جسمه مبين معضل ولونه برونزي عيونه ماكانت متاكده هي زرقاء والا خضراء والا رماديه المهم انه لونها يجنن كأنه نجم من نجوم هوليود باين عليه اسباني او يمكن ايطالي لالا يمكن استرالي مدري المهم انه مو عربي شاب من اوسم الشباب
الي قابلتهم مشاعل او ممكن تقابلهم بحياتها فيه كل معاني الرجوله والجمال والاناقه شعره كان مرتب ولبسه قمه في الاناقه كان لابس جينز وتيشرت مبين بروز صدره وواضح انه يمارس الرياضه مو اقل من 5 سنوات ولما فتح الشباك تحس ان السياره جواها حديقه
من الريحه الحلوه الي طلعت منها تاكدت ان الشاب مو عربي لان لوحته كانت من السفاره يا الله كان نفسها تعرف اسباني والا ايطالي لالا يمكن امريكي كانت مشاعرها مختلطه بالاعجاب والتعصيب من الحر وحركته الي سواها مع سواقها فما كانت تعرف ايش تسوي
تبتسم لهالوسيم والا تصارخ بوجهه بس الي كانت مستغربته ان الاجانب مايسوو هالحركات انه يعاند وحده على موقف سياره قررت اخيرا تهزئه وتوقفه عند حده
مشاعل: ار يو كريزي هاه؟؟؟
الاسباني: سمي
مشاعل فتحت عيونها على اخر شي اسباني وسمي لالا مستحيل اكيد هذي ضربه شمس مستحيل مستحيل يكون عربي مو بس خليجي لالا اكيد انا انهبلت اكيد
ايش رايح يصير مع الشاب الاسباني الخليجي ؟؟؟؟
000000000000000000000000000000000

================================================== ============

مشاعل كانت في قمة الذهول من الي صار ومن الي شافت ماتدري ايش تسوي تبتسم او تعصب تذكرت انها جت علشان تهزئه على الحركه الي سواها ولازم تستجمع شجاعتها وتبدا مثل عادتها بالهجوم بس كيف راح تقدر ترفع صوتها على اوسم رجل قابلته بحياتها وهي في دوامه التفكير قطع عليها صوته الهادي الصوت الي اي بنت راح تطرب له
الشاب: ما اتوقع انك طلبتي مني افتح الشباك علشان تطالعيني؟؟؟
مشاعل حست بالاحراج ايش راح يقول عني مشفوحه؟؟
مشاعل بدت تتكلم بكل نعومه ودلع: سوري .. امممم ... بس حبيت اقول لك ممكن تبعد سيارتك لانك ساد علينا الطريق ؟؟؟ وعطته ابتسامه كلها دلع
الشاب عطى مشاعل نظره إحتقار وإشمئزاز من فوق لتحت وقال : لما تتكلمي معاي مره ثانيه ياليت تبعدي فمك عني لان ريحتك مو حلوه واقرفتيني ؟؟؟ مدري اهلك ماعلموك شلون تهتمي بنظافتك؟؟؟؟
وتجاهلها حتى ما انتظر انها ترد عليه
التفت على الشاب الي جنبه بالسياره وقال له: ابو خليل تصدق كنت ميت جوع والحين اف لو تجيب لي احلى اكله صدقني مستحيل تدخل فمي ايش القرف هذا على الظهر ريحه خايسه وشكل معفن افففف ,, وين بطتي بس؟؟؟
ابو خليل يوجه كلامه لصاحبه وكأنها مو موجوده: ههههههههه شوي شوي على البنت لا تخدش مشاعرها هههههههههه
الوسيم: ههههههههه ليش والاشكال هذي تتوقع انها انثى أنا اشك , وبعدين هذي ماعندها احساس هههههههههههههههه
ابو خليل: على قولتك ههههههههههههه
الحين حست مشاعل مثل التنين الي يطلع من خشمه نار بس هي الحين حست ان كل مكان يطلع منه نار ولو معاها سكين ماراح تكتفي بقتله لالا اتوقع راح تقطعه مكعبات علشان تتاكد انه مافيه امل يعيش
واخيرا تذكر ان فيه وحده واقفه عند الشباك والتفت لها
الوسيم: اوووه انتي للحين هنا تحزني هههههههههههههه
مشاعل بكل هدوء: انا مدري ليه اتكلم مع واحد همجي ومتخلف مثلك ,, لاتفكر انك بتنرفزني بهالكلام انا مايهمني رايك فيني انت حشره بالنسبه لي , واذا انا قبيحه وخايسه مثل ماتقول بعد سيارتك علشان ماتضطر تشوفني , او تبيني اتصل على الشرطه وهم يحلو المشكله بمعرفتهم
الوسيم: انا ما أبديت رايي فيك لانك مو من مستواي لا ماديا ولا بالشكل ولا حتى بالثقافه هههه , انا كنت اكلم صاحبي هذا اولا وثانيا انتي اسمك التخصصي؟؟؟
مشاعل: التخصصي؟؟؟؟
الوسيم: الشارع هذا اسمه التخصصي وماتوقع ان هذا شارعك وانا حر اوقف وين ما ابي محد يقول لي وقف هنا او لا توقف هنا فاهمه ياشاطره يله روحي العبي بعيد
وبكل احتقار طالعها وسكر الشباك
مشاعل ماتدري تبكي والا تكسر الشباك ولا تصارخ حقير جد ما احد تجرء يهينها بهالشكل ابد ابد كيف يتجرء ,,,,, لا شعوريا مشاعل صارت تضرب الشباك باقوا ماعندها ,,, فتح الشباك ونظرته كلها برود وكأن الي قدامه حيوان مو بنت ولها مشاعر جد مغرور
مشاعل بدت تتكلم بصراخ بدون ماتحس بنفسها: اسمع انت وربي لو ما حركت سيارتك والله والله والله ماراح يصير لك خير ,, تفهم والا لا ... صدق انك مو متربي
وللمره الثانيه تجاهلها والتفت لصاحبه كانه ماكانت تتكلم ولاحتى فكر انه يبين انه عصب لا بالعكس قمه التجاهل والبرود وكأنها شحاذ عنده صار له ساعه يطلب منه حسنه وهو مطنشه
كان يقول لصاحبه : ابو خليل والله انا خايف الحين بطتي تجي وتشوف هالشينه واقفه والله جد ماله داعي
ابو خليل: تخيل عاد تحسبها خويتك والله فشيله لو البنت حلوه قلنا اوكي بس مقشع
الوسيم: اعوذ بالله اخاوي هالاشكال وووع فاله الله ولا فالك لالا لو بطتي شافتها راح تحسبها خدامه تعرف هي زين ان ذوقي راقي
ابو خليل: اقول شوف اظن هذي خويتك الي واقفه هناك؟؟
مشاعل: انت هيه والله لاخليك تندم على كل كلمه قلتها لي وتشوف اذا ماخ..
رد على موبايله ومو غريبه عليه انه يطنشها وهي تتكلم اصلا هو كان معتبرها حشره من اول ماشافها
الوسيم يكلم بالموبايل : هلا بطتي ,, اوكي شفتك ,,, ايه هذا انا معاي ابو خليل ,,, يالله حبيبتي هذا انا جاي حركي سيارتك ,,,, (ويطالع مشاعل) لالا هذي شحاذه مسكينه قلنا لها الله يعطيك مو راضيه تفهم تعرفي هالشحاذات ماعندهم كرامه..هههههه اوكي بطتي باي
التفت عليها وقال: يالله انا طالع انتي حره الحين تقدري تطلعي سيارتك بس راح انصحك نصيحه غطي وجهك احسن علشان الشباب يرقموك لانهم لو شافوا وجهك اكيد محد حيرقمك الا اذا كان اعمي ههههههههه باي (وقفل الشباك وحرك السياره)
مشاعل صارت تصارخ بالشارع : ليه ماتشوف وجهك انت يالشين يالخايس صدق انك حقير لو انت رجال ارجع كلمني لكن انت بزر
السواق يوسف: عمتي مايسمعك السياره بعيده
مشاعل تصارخ : مالك شغل انت وخر عن وجهي
وراحت ركبت السياره وهي منهاره ماتدري هي في حلم والا علم جد الي صار لالا اكيد حلم مابعمرها احد عاملها بهالطريقه ولا احد فكر يهينها وهو من اول ماكلمها وهو يهينها , بس ليش قال هالكلام
مشاعل " انا مو قبيحه ليش قال عني اني قبيحه وليش يقول اني اخر وحده يفكر اي واحد انه يتعرف عليها ياما شباب منجنين علي ويتمنوا انهم يرقموني,,, طيب ليش قال هالكلام؟؟ هو مايعرفني يعني ماله مصلحه انه يهيني ,,,, اكيد انا قبيحه ؟؟؟ لابس انا مو قبيحه !!!! طيب وين كنت لما كان يهزئني ؟؟؟ ليش مارديت؟؟؟ وين لساني ؟؟؟ انا عمري ماسمحت لاحد يقاطعني ,,, وهذا مو بس قاطعني ,, الا اهاني وهزئني قدام الناس ,,, ليش مارديت ,, يا الله انا غبيه وين كان لسااني وين؟؟؟؟"
مشاعل كانت منصدمه ماعمر احد تجرء ورفع صوته عليها او اهانها يمكن الصدمه هي الي خلتها تسكت وماتعرف ايش تقول لحظتها كانت مو مستوعبه الي يصير , ساعات الانسان مايقدر يستوعب بعض المواقف الا لحد ماتنتهي ويبدا يلوم نفسه ليش ماقلت وليش ماسويت واظن هذا اللي صار مع مشاعل
السواق: عمتي وصلنا للبيت
مشاعل بدون ماترد نزلت وهي تبكي من القهر ومو مستوعبه اللي صار وتذكرت ان اليوم السبت وهو يوم ام مشعل يعني ابوها مو موجود اليوم كويس علشان مايشوفها وهي تبكي
السواق: عمتي متى اروح للوكاله علشان شباك السياره ؟؟؟
مشاعل ماردت ودخلت البيت كان في الصاله فيصل اخوها (5 سنوات) جالس عند التلفزيون ويطالع افلام كرتون تحاشت انها حتى تتكلم معاه علشان مايلاحظ انها تبكي ويقول لامه
طلعت غرفتها والحمدلله محد حس فيها قفلت الباب وقفت متسنده على الباب حست انها ماتقدر تمشي لحد السرير حست انها منهاره مو قادره تتحرك وجلست على الارض وظلت تبكي وتبكي وتبكي
" انا ميشو واحد حقير يهيني ليش؟؟؟ يا الله ليش سكت ليش؟؟؟؟ قهر ياليت الزمن ينعاد والله لوريه شغله ,,, بس ليش عاملني بهالطريقه ,,, حتى لو كنت قبيحه على الاقل يراعي شعوري قبيحه؟؟؟"
بدت علامات الاستفهام على وجه مشاعل وقامت وراحت عند المرايه ووقفت تطالع نفسها " انا قبيحه؟؟؟ "
وظلت تطالع ملامحها بدقه
"بس كل البنات يقولوا عني حلوه وكل الشباب الي تعرفت عليهم ينجنوا علي ؟؟؟ ليش هذا يقول اني مو حلوه ؟؟؟ قهر الولد كان مره عاجبني اكثر من اي واحد قابلته بحياتي ,, ليش حظي كذا؟؟؟ اووووه انا افكر في هالواطي وهو من اول ماشافني وهو يهينني ,,, طيب انا اوريه ,, راح نشوف من يغلب بالنهايه انا والا انت"
اخذت مشاعل موبايلها ودقت على السواق
مشاعل: الو يوسف
يوسف السواق: سمي
مشاعل: تذكر السياره الفراري اليوم الي عند فدركرز ؟؟؟
ماكانت تبي تقول له الي تطاقيت معاه لانها ماتبي تتذكر الكلام الي قاله لها
السواق: ايه طال عمرك
مشاعل: كم رقم لوحته؟؟؟
السواق: ماحفظتها طال عمرك
مشاعل: شلون يعني ماحفظتها؟؟؟ انت السواق والا انا ؟؟؟
السواق: انا طال عمرك بس مانتبهت الا انها لوحه من السفارات
مشاعل: لا والله ما اسمع شي جديد انا ابي رقم اللوحه
السواق: والله ماقريتها عمتي انا اسف
طوط طوط طووط
قطعت الخط
مشاعل: اف والحل ايش اسوي من وين راح اجيب لوحته لازم اعرف هو ولد مين ,, ايش اسوي؟؟
دق موبايل مشاعل وكان راكان يتصل وطبعا مو فاضيه ولا رايقه له فطنشته
مشاعل: يا الله نسيت ساره داقه علي مليون مره خليني ادق عليها واشوف ايش صار بموضوع فهده
مشاعل خذت الموبايل ودقت على ساره الي لقت معاها خط وطبعا ميشو ماتحب تدق على اي شخص حتى لو كانت اعز صديقه لها ساره ويكون معاها خط ماتحب تكون على الانتظار
علشان كذا قفله وارسله لساره رساله
" سارونه لما تنتهي من مكالمتك دقي علي "
دخلت الحمام واخذت دش يهدي اعصابها خاصه بعد الوقفه بالشمس مع صاحب الفراري طلعت من الحمام وحاولت تنام وتتقلب يمين يسار بس كل مانقلبت لقت صورته قدامها وتاخذ المخده وتضرب في المكان الي تتخيل صورته فيه يمكن تقدر تطفي نار كرهها وحقدها واخيرا استسلمت للنوم

شكرا على الموضوع الرائع
اجمل تحية

أجمل قصة حـــب الجزء الثالث !!!!!!!!!!!!

القوانين العامه لعلبة الدردشه

قوانين منتدى الحب الحقيقي عالم الاشهار