بسم الله الرحمن الرحيم
♥♥♥♥قصة حب في الرياض♥♥♥♥
بصورة الهدايا
اما بعد :
هذه القصة حقيقة – و انا صاحب القصة ولي تعجبه القصة أتمنى منه يذكر الله يقول مشاء الله والله لا يفرقهم .
سبب كتابتي القصة :
1- عشان عطيتها وعد بأني راح اكتب القصة إلى بيننا وأنشرها.
2- عشان تعرفون أن فيه حب صادق فى ها الزمن .
3- عشان تعرفه إذا النية صادقة بين الطرفين فهى راح تدوم ولا يدوم إلا وجه الله .
4- عشان ما تظلمون الحب بأفعال أشخاص دخلين على الحب .
• وأروع شيء في هذه الدنيا الفانية هو (الحب )
راح اتكلم بتلقائية شديدة كنى أسوالف معكم فسامحوني على الاخطاء . وأنا اعرف ان القصة الجميلة لها شروط ولاكن أنا ما اعرفها وأبي اتكلم معكم كنى أسوالف معكم لأني أول مره اكتب قصة لا كن لعيونها راح أكتب ...
ابطال القصة :
• بدر ساكن فى الرياض .
• أشواق ساكنه في المدينة المنورة .
كنت يوم من الايام في السيارة ومعي صاحبى اسمه حمد وكنا وقتها مشغولين نتكلم في موضوع حامي، دقت اشواق على حمد بالغلط وحمد يقولها : لا انتى غلطانة أشواق شافته عصبي بدت تطقطق عليه وهي تضحك ومن كثر ما عصب حمد شفايفه تشققت وهو من أهل حايل وطبعة حاد وقاسي
قلت : لحمد عطنياها أكلمها وكلمتها وبطبعي رايق وراعي استهبال بدينا نسولف ونستهبل على بعض وهي تقول انا غلاطانه قلت لها حتى انا غلطان قالت لا شكلي مو غلطانة قلت اكيد انا رقمتك انتى أي وحده فيهم أم دراعه أو تنوره جلست تضحك
قلت لها انا مشغول الحين وبعدين اكلمك خلصت الموضوع مع حمد ونزل من السيارة وجلست أفكر فيها شدني ظحكتها وبراءتها وأدبها في
نفس الوقت معي
وكلمت حمد قلت له لا تكون مرسوله علينا وفي الاخير نطلع خرفاان (ههه) وسألت حمد في أحد مسوى معه مشكلة لأنها تصير بين الشباب يسونها في بعض قالى حمد لا ما فيه أحد صايره بيني وبينه مشكلة قلت: له طيب أووكيه وجاء الفجر ودقيت عليها وجلسنا الى اظهر نسولف ونضحك ضحك حق سنه قدام . سكرت منها ومن بعدها بيوم كلمنا بعض
أنا بنسبة لى شدنى ظحكتها وخفه دمها وبراءتها وكانت البراءة واضحة مثل وضوح الشمس في كثير من المواضيع الى تكلمنا فيها .
حركت شئ في داخلي وفيها صفات أنا احبها مثل الحياء، والأدب في الكلام ،والبراءة ومع هذا كله خفة دمها
أجمعت الشمس والقمر في قلبها ، المهم هزة كيانى وصارحتها أشووواق أنا (أحبك )
قالت : الحب ما يجي بسرعه هذى مالنا فترة مع بعض وأنت
تعررف يا بدر ان الحب كذا وكذا وكذا أنا سررحت وهي تتكلم عن معنى الحب طبعا سرحت فيها وزاد اعجابي بعد ما خلصت من كلامها قالت: لى مشكور على شعورك بس بعدها حسيت أنها استحت وغيرة الموضوع ، وجلسنا فترة نكلم بعض نسولف ونضحك وصارت اشياء ومواقف كثيرة صارت بيننا مضحكة،
حتى جاء يوم من الأيام قالت: لى شكلك تبيع خضار وسروالك طويل ولونه بوني وشعرك كدش طبعا كل حرف تقوله تجلس تضحك ساعة قلت لنفسي لازم أبادلها نفس شعور الهبال ألي فيها ونتي كنك عجوز وعندك بسطه تبعين قدام الحرم منديل وفووط وتجلس تضحك لين بطنها يعورها ، وجلسنا فترة بينى وبينها مكالمات والحوار إلى يدور بينى وبينها مواضيع عاادية وأكثرها ضحك
وبعدها قالت : بدر (أحبك ) طبعا فرحتى كانت كبيره جدا والأرض ماشالتنى من الفرحه وسألتها سبب حبها لى ...؟!!
قالت :طول ها الفترة معي ما تكلمت بكلمه وحده فيها قلة ادب معي ولا طلبت شيء منى كل الأولاد أو الشباب يبونه .
قلت لها : والله يا إشواق انا ما اسعى وراء جنس او شهوه أنا
(أحب الحب أبي حب صادق)
طوولت عليكم ...................؟؟!!
واستمرت علاقتنا وكل يوم معها يكون احسن من إلى قبلة وجوالى امتلاء رسائل حب، وشوق ،ولهفة ،ورومانسيه وتعلقنا في بعض اكثر حتى إذا جاء يوم اكون مشغول فيه وأقولها بطلع تسالنى ؤوين بتروح وش لابس تعشيت او ما تعشيت ، إنتبه لنفسك ومن طلعتي لمشواري بربع ساعة تتصل على ؤوينك فيه وليه تأخررت ؟
يوووه حسيت باهتمام وحنان وخوف علي وكل يوم يزيد حبنا لبعض ودائما نضحك ونهدي بعض أحلى الأغاني وكلمات الحب كل واحد فينا عطى الثاني إلى يحبه (لا يروح تفكيركم بعيد ) أقصد فيها من حب واهتمام وحنان وخوف على بعض
يوميا نكلم بعض أقل شيء إذا سرنا مشغولين ساعتين يوميا ودائما نسهر إلى الصباح ست او سبع ساعات يوميا تعوت عليها وتعودت علي وإذا جينا نسكر السماعه من بعض نقول متى يجى بوكره عشان نكلم بعض
اه ه ه يعااالم عشت معاها احلى واجمل ايام عمري وعاشت اجمل ايام عمرها
انا بتكلم عن نفسي شوي انا راعى مشاكل على خفيف حلوه على خفيف المهم لى لقب في الرياض من كثر المشاكل الي على خفيف (ههههه) إذا قلت لها عندى مشكله عززي لى قالت روح يا ....قاهرهم عداك العيب واذا قالت لي هذا الكلام . اروح للمشكلة وأكشر عن انيابي كنى اسد ولي رايح لهم خرفااان أكلهم ورجع البيت اكلمها ومحد يشغلنى كثرها كل شوي تتصل على تقول بدوري وينك ؟ فيك شيء بدوري؟ خليهم بدوري عشانى بدوري بدوري تكفى خليهم بدوري ، بدوري اقول طيب دام انتى خايفه علي ليش تعززين لي ؟ قالت بسوي اشي الى انت بتحبه
اه ه يحبيها ومع الوقت صرت ابى ابعد عن المشاكل ابى اسولف معاها بس ومن حبها في قلبى ابعدتنى عن المشاكل بتدريج صار وقتى كله معاها نضحك ونسولف ونتكلم في مواضيع عامة ونتناقش وانا احب القراءة وكتب اختبارات الذكاء وكتب تطوير الذات ودائما كنت اختبرها وسبحان الله النتيجة تطلع دائما متقاربه بينى وبينها بشكل عجيب وغريب ، بعدها نستغرب ونضحك من بعض لان النتيجة متقاربة جدا بينى وبينها في اختبار الذكاء العاطفى والذكاء الاجتماعي والذكاء الحسابي وطبعا هى تطلع احسن منى في الذكاء الحسابي لان تخصصها رياضيات وتجى لنا بعض المشاكل بينى وبينها بعض الاحيان كم مره كسرت الجوال وكم مره قفلت جوالى لانها ترفع ضغطى بعض الاحيان من غيرتها واطول مده قدرت ابعد عنها واقفل جوالى ثلاث ايام اكثر من كذا ما اقدر استغني عنها
وخلال الثلاث ايام تتصل على اصدقائي المقربين منى جدا وتسالهم عنى ليه مقفل جواله اذا هو ما يبيني ما يخالف بس ابى اطمن عليه واكثر الاوقات الي نتخاصم فيها اذا جتها ادوره الشهرية (اعزكم الله ) وقتها تقلب علي قلبه الييمه لأن يزداد عندها الحساسية ولازم نزعل من بعض كل شهر لانها تكوون حساسه زياده عن الزوم وغيوره موت جننتنى بالغيرة عشان كذا انا اعصب ونتخاصم وطبعا آذا عصبت تسميني بديرررر واذا كانت راضية تسمينى بدوري .
وسلامتكم
اتمنى تنشر القصة لين توصل لها وسبب انقطاعنا عنا عن بعض ما اقدر اكتبه واذكره لكم واتمنى منكم تنشرونها لين نقدر نوصل لبعض وترجعون قلبين في الحب ملهوفه وسامحونى على الاسلوب الى تكلمت فيه لا كن انا قايلكم من البداية راح اكتب القصه بتلقائية شديدة وأتمنى من كل قلبي ان تنال اعجابكم
ملاحظه : انا اتكلم للعشاق ولناس الى قلوبهم بيضاء ويعرفون مغزى كلامي ويحسون فيه ويعيشون القصه
وشكرا لكم ...
صاحب القصة رقم البن : 282E6043
الرئيسية
الأحداث
